Зүрхний ишеми өвчин гэж юу вэ?

Бид нар өөхтэй мах хэтрүүлэн идэх, хөдөлгөөний хомсдол болж зарцуулалтгүй болох, агаарын бохирдол тамхи их татах, удамшил эерэг байх зэрэг эрсдлийн улмаас зүрхийг хангах титэм судасны хатуурал үүсдэг. Титэм судасны доторх хана хатуурвал судасны доторх сүв нарийсч цус дамжуулахад бэрх болно. Хүндэрсэн үед энэ сүв бөглөрч болдог. Титэм судасны бөглөрөл үүсэх 2 том шалтгаан байдаг. Нэгдүгээрт, титэм судасны нарийслын суурь дээр нөж үүсч судсыг шууд бөглөж болно. Энэ титэм судсанд нөж үүсэх үйл явц зүрхний гэнэтийн нас баралтын томоохон хувийг эзлэдэг. Хоёрдугаарт, титэм судасны хатуурах үйл явц эрчимтэй явагдаж удаан хугацаанд бөглөрч болно. Энэ бол их цөөхөн тохиолддог, яагаад гэвэл судасны сүв нарийсч бөглөрөх гээд байтал нөж буюу бүлэн үүсэх магадлал өндөр байдаг. Титэм судас бөглөрч цусан хангамж очихгүй бол зүрхний ишеми бүү хэл зүрхний шигдээс буюу зүрхний булчингийн үхжил үүсдэг.

Зүрхний ишеми өвчин бол зүрхэнд ирэх цусан хангамж хомсдохыг хэлж болно. Энэ цусан хангамж хомсдох шалтгааны дийлэнхийг зүрхийг хангах титэм судас нарийсах шалтгаан эзэлдэг. Гэхдээ титэм судас хэвийн боловч зүрхний булчинд ирэх цусан хангамж хомсдож болно. Тухайлбал, зүрхийг тэжээх титэм судас агшилт өгөх, зүрхний булчин томорч цусан хангамж хүрэлцэхгүй байх зэрэг ордог. Одоо титэм судасны агшилт өгөх эмгэг олширч байна, яагаад гэхээр агаарын бохирдол, стресс хэмээх зүйлээс болж хэвийн байсан титэм судас агшиж голчийн хэмжээгээрээ нарийсч зүрхний ишеми өвчин үүсдэг. Жишээлбэл, агаарт агуулагдах хүхэрлэг хий бол эд эсийг цочроох шинж чанартай. Хүхэрлэг хийгээр амьсгалбал амьсгалын замын булчин агшиж астма шиг амьсгал боогдох, бачуурах шинж илэрч болно. Хэрвээ хүхэрлэг хий уушгины тусламжтайгаар цусанд орсон бол судасны доторх давхаргын эндотель эс цочирч агшилт өгөх магадлалтай. Титэм судас агшилт өгвөл зүрхний ишеми өвчин үүснэ гэсэн үг.

Беавермед, Зүрх судасны эмнэлэг (facebook.com/beavermedhospital)
Ажлын цаг: Даваа - Баасан 09:00-18:00, Бямба ням амарна,
Цаг авах утас: 80857724
Хаяг: БЗД, 12 хороо, Ботаник центр, 104/2 байр, 2F-24 тоот